Liðin mætast í umspili um að halda sæti sínu í B-deild Þjóðadeildarinnar. Fyrri leikurinn fer fram í Kósóvó á fimmtudag en sá seinni, sem telst heimaleikur Íslands, á Spáni á sunnudag.
Foda ræddi við Morgunblaðið í dag um þessa mikilvægu leiki, en það getur skipt sköpum að vera í B-deildinni í næstu Þjóðadeild er kemur að möguleikum að komast inn á EM 2028.
„Lið Íslands er mjög vel skipulagt og það eru gæði í leik þess. Íslendingar eiga marga leikmenn í sterkum deildum erlendis. Þetta snýst fyrst og fremst um okkar eigin áherslur og við munum búa okkur mjög vel undir að mæta þessum andstæðingi,“ segir Foda við Morgunblaðið.
Hann var þá spurður að því hvaða leikmenn Íslands hann óttaðist mest. „Orri Óskarsson, Hákon Haraldsson og Albert Guðmundsson.“
Foda er þá ekki sammála þeim sem telja Ísland sigurstranglegra fyrir komandi leiki liðanna.
„Ég tel að við getum leyft okkur að vera ósammála. Ég tel að líkurnar séu 50:50.“
