Það vakti nokkra athygli þegar í ljós kom að Björn Berg Bryde væri hættur sem aðstoðarþjálfari Stjörnunnar í Bestu deild karla. Björn hætti nú í upphafi árs en svo virðist sem eitthvað mikið hafi gengið á.

Björn hafði í rúmt ár aðstoðað Jökul Elísabetarson í Garðabænum en hefur látið af störfum, hvorki Björn né Stjarnan hafa kosið að ræða þessi tíðindi og kjaftasögurnar grassera.

Ein af þessum kjaftasögum kom til umræðu í útvarpsþætti Fótbolta.net um helgina. „Hafið þið heyrt eitthvað um það, mér var sagt að þetta væri í fússi en ég hitti hann og hann spáir þeim Íslandsmeistaratitlinum,“ sagði Tómas Þór Þórðarson starfsmaður Sjálfstæðisflokksins og íþróttafréttamaður.

Elvar Geir Magnússon, ritstjóri Fótbolta.net tók þá til máls og kastaði fram sögu. „Ég get hent fram kjaftasögu, því þeir vilja ekki tjá sig um hvað gerðist eða hvernig þetta var. Það sem ég heyrði að hann hefði pantað sér ferð með konunni erlendis og á undirbúningstímabili, það fór illa í Jökul,“ sagði Elvar Geir.

„Þetta var bara við eða ferðin, þetta er sagan sem er að ganga. Þessi saga gæti verið kjaftæði en ég fæ ekki samviskubit með að fara með hana í loftið því þeir vilja ekkert segja okkur,“ sagði Elvar Einnig.

Tómas Þór segir þetta hefð í Garðabænum að láta kjaftasögur fljúga og ekki segja neitt einasta orð. „Stjörnumenn eru meistarar í að láta sögusagnir grassera um sig.“