Velski miðjumaðurinn Aaron Ramsey hefur staðfest að samningi hans við mexíkóska liðið Pumas UNAM hafi verið rift, aðeins fimm mánuðum eftir að hann gekk til liðs við félagið frá Cardiff.

Þessi 34 ára gamli leikmaður, sem áður lék með Arsenal, Juventus og Rangers, hefur gefið út yfirlýsingu vegna málsins, þar sem hann lýsir meðal annars yfir vonbrigðum með niðurstöðuna.

„Ég vil þakka fólkinu hér í Mexíkó fyrir að taka svo vel á móti mér og fjölskyldu minni. Því miður var samningi mínum rift, sem kom mér mjög á óvart og voru mikil vonbrigði. Það er því ekkert annað að gera en að fara heim til Wales,“ segir þar.

Miðjumaðurinn spilaði aðeins sex leiki fyrir Pumas og skoraði eitt mark á þeim tíma, en hann glímdi einnig mikið við meiðsli.