Stefán Pálsson, sagnfræðingur og knattspyrnuáhugamaður með meiru, var gestur Helga Fannars Sigurðssonar í nýjasta þætti af Íþróttavikunni á 433.is.

FIFA hefur verið í brennidepli fyrir ýmsar sakir undanfarið og vakti það til að mynda athygli á dögunum þegar sambandið frestaði tveimur leikjum af þremur af banni Cristiano Ronaldo svo hann gæti tekið þátt í öllum leikjum Portúgal á HM.

„Það sem mér finnst mesta lágkúran í þessu er að FIFA hafi algjörlega grímulaust vikið öllum sínum reglum til hliðar varðandi leikbannið hjá Ronaldo. Það séu sumir sem eru of peningalega verðmætir til að fara í leikbann,“ sagði Stefán um þetta.

Einskorðast svona ekki við Ronaldo.

„Maður fékk smá skítabragð á Copa America síðast þegar það var gulltryggt að Brasilía og Argentína myndu mætast í úrslitum, þau gátu ekki mæst fyrr í keppninni og svo bara spurning hvort þeim tækist að komast alla leið.

Svo var það tryggt að Messi færi alla leið í úrslitaleik. Framlengingu var sleppt án neinna útskýringa á svona stuttu móti, vellirnir þegar Argentína spilaði voru hafðir eins litlir og reglugerðin mögulega leyfði til að ná sem mestu út úr litlu löppunum. En menn gengu kannski ekki svo langt að rauð spjöld gildi ekki,“ sagði Stefán enn fremur.

Þátturinn í heild er í spilaranum.