Leikmaður ensku úrvalsdeildarinnar, Yves Bissouma, hefur sagt frá því að hann hafi neytt svokallaðs hippakrakk í kjölfar röð ógnvekjandi innbrota sem kostuðu hann um eina milljón punda.

Miðjumaður Tottenham Hotspur, sem var keyptur á um 40 milljónir punda, sást á myndum í The Sun on Sunday í síðustu viku þar sem hann var að anda að sér ólöglegu efni.

Bissouma tengir hegðunina við alvarlegt áfall eftir nýlegt innbrot á heimili hans. Hippakrakk er tegund af hláturgasi.

„Mér þykir þetta leitt. Þetta atvik braut eitthvað í mér sem ég vissi ekki einu sinni að gæti brostið,“ sagði Bissouma.

„Ég bið stuðningsmenn afsökunar. Áfallið bætti við líf mitt ótta, kvíða, þunglyndi og ofsóknarhug.“

Þetta er í annað sinn sem Bissouma, sem þénar um 50 þúsund pund á viku, er staðinn að notkun þessa efnis. Hann var tímabundið settur í bann hjá Tottenham í ágúst í fyrra eftir fyrsta atvikið.

„Mér líður mjög illa með þetta,“ bætti hann við.

„Þegar myndirnar birtust hafði það mikil áhrif á mig og alla í kringum mig, sérstaklega fjölskylduna mína. Faðir minn varð mjög skelkaður. Ég reyndi að útskýra fyrir honum að þetta væri erfið mynd, en hún skilgreinir mig ekki sem manneskju.“

Bissouma viðurkennir að hegðunin sé ekki við hæfi. „Ég veit að þetta er ekki gott fyrir mig né ímynd mína, sérstaklega þar sem ég er atvinnumaður í knattspyrnu,“ sagði hann.