Stefán Pálsson, sagnfræðingur og knattspyrnuáhugamaður með meiru, var gestur Helga Fannars Sigurðssonar í nýjasta þætti af Íþróttavikunni á 433.is.
Pétur Pétursson, fyrrum þjálfari kvennaliðs Vals sem raðaði þar inn titlum, skaut á nýja stjórn félagsins í pistli á dögunum.
Rúmt ár er síðan Börkur Edvardsson yfirgaf Val eftir ótrúlegt starf sem formaður og nýr formaður og stjórn tóku við. Þau hafa ákveðið að fara aðrar leiðir, sem var áberandi með kvennaliðið á síðustu leiktíð.
Ný framtíðarstefna var kynnt fyrir stuðnignsmönnum á dögunum og Kristinn Ingi Lárusson, stjórnarmaður í Val, sagði til að mynda í viðtali við Fótbolta.net að stefnan á Íslandi hafi of mikið verið á þann veg að menn tjaldi til einnar nætur.
„Téður stjórnarmaður skaut sér mjög rækilega undan því að tala um kvennaboltann, eins og það væri bara einhver verkaskipting og kæmi honum ekkert við,“ sagði Stefán í Íþróttavikunni.
Pétur, sem skilaði mögnuðu starfi sem þjálfari kvennaliðsins og vann Íslandsmeistaratitilinn til að mynda fjórum sinnum, var látinn fara frá Val eftir tímabilið í fyrra. Árangur kvennaliðsins var svo arfaslakur í ár.
„Maður hefur ekki séð botn detta eins rosalega úr einu toppliði eins og hjá Valsstelpum í sumar. Maður var farinn að hugsa hvort þær gætu fallið en þær hörkuðu út úrslit og breiddin fór að segja til sín hjá öðrum liðum. En þetta var ekkert í líkingu við það sem maður hefur séð hjá Val árin á undan.
Ég skil alveg að það hlýtur að vera erfitt fyrir mann eins og Pétur sem lítur svo á að hann hafi búið til ansi mikið legacy-lið að sjá það fjara út svona hratt. Um langt árabil höfum við bara verið með Breiðablik og Val sem langöflugustu liðin og liðin sem hirða allt sem hreyfist hjá lakari liðum,“ sagði Stefán og hélt áfram.
„Það virðist vera niðurskurðargír víða í kvennaboltanum og það er eins og Valsarar hafi slegið tóninn. Það er eins og önnur lið séu að fylgja og það varð til dæmis hvellur í kringum Framarana mína við lok mótsins. Ég ætla bara rétt að vona að fólk þar á bæ svari því, mér þætti ferlega dapurt ef við getum ekki byggt ofan á sumrinu.“
Þátturinn í heild er í spilaranum.
