Bókin, Óli Jó – Fótboltasaga er komin út en þar fer Ólafur Jóhannesson fyrrum landsliðsþjálfari sinn yfir feril sinn sem þjálfari. Magnaðir tímar með FH og Val og annað sem gerðist á hans ferli.
Frá 2007 til 2011 var Ólafur landsliðsþjálfari Íslands og þar gekk á ýmsu. Á Vísi.is í vikunni var fjallað um einn leikmann sem mætti ekki í landsleik vegna barnaafmælis.
„Eitt sinn valdi ég leikmann sem sagðist ekki komast í viðkomandi leik því sonur hans átti afmæli og konan hans treysti sér ekki til að halda ein upp á það. En hann sagðist koma í næsta leik. Hann var bara vanur því að vera valinn. Sami leikmaður gat líka einu sinni ekki talað við mig þegar ég kom út til hans því hann þurfti að fara í ísbað,“ sagði Ólafur í bók sinni en nafngreinir ekki manninn.
433.is hefur fengið staðfest að sá sem um ræðir er Jóhannes Karl Guðjónsson þjálfari FH í dag. Þetta fæst einnig staðfest með því að skoða gömul Fréttablöð. Jóhannes lék þá á Englandi.
Í Fréttablaðinu í september árið 2009 kemur þetta fram. „Jóhannes Karl hefur reyndar aldrei spilað landsleik undir stjórn Ólafs þótt hann hafi tvívegis verið valinn. Í raun stóð til að velja hann í þriðja leikinn, eins og fjallað er um hér að neðan, en Jóhannes Karl baðst þá undan þar sem fram undan væri sameiginlegt barnaafmæli drengja sinna,“ segir í Fréttablaðinu frá þeim tíma.
Um bókina
Hér segir Ólafur Jóhannesson sögu sína á fádæma skemmtilegan og beinskeyttan hátt. Uppvöxturinn, fjölskyldan, leikmannaferillinn í fótbolta og handbolta, þjálfun í rúma fjóra áratugi, sigrar og töp, gleði og sorg. Óli hefur upplifað allt sem hægt er að upplifa í íslenskum fótbolta. Einstök frásögn sem varpar ljósi á þróun fótboltans í hálfa öld.
Ólafur Jóhannesson er goðsögn í íslenskri knattspyrnu. Hafnarfjarðarguttinn sem fór snemma út í þjálfun og gerði það gott á Vopnafirði og í Borgarnesi en varð síðan margfaldur Íslands¬meistari, bikarmeistari og landsliðsþjálfari.
Maðurinn sem gerði FH að stórveldi og vann síðan fjóra stóra titla með Val.
Hér segir Óli sögu sína á fádæma skemmtilegan og beinskeyttan hátt. Uppvöxturinn, fjölskyldan, leikmannaferilinn í fótbolta og handbolta, þjálfun í rúma fjóra áratugi, sigrar og töp, gleði og sorg. Óli hefur upplifað allt sem hægt er að upplifa í íslenskum fótbolta.
Hann leggur nú spilin á borðið með einstakri frásögn sem varpar ljósi á þróun fótboltans í hálfa öld og hlífir engum, allra síst sjálfum sér.
Allir áhugamenn um íslenskan fótbolta verða að lesa sögu hins eina sanna Óla Jó.
