Mohamed Salah hefur fengið miklar skammir eftir að Liverpool tapaði 4-1 fyrir PSV Eindhoven á Anfield í Meistaradeildinni.

Tap Liverpool var þeirra þriðja í röð og liðið hefur nú fengið á sig tíu mörk í síðustu þremur leikjum. Arne Slot er því undir mikilli pressu eftir níu töp í síðustu tólf leikjum í öllum keppnum.

Dietmar Hamann, fyrrum leikmaður Liverpool, gagnrýndi Salah harðlega á RTE Sport og sagði varnartilburði hans í öðru marki PSV til skammar. Mauro Junior fór framhjá Salah á eigin vallarhelmingi og fékk að skokka 30 metra upp völlinn án þess að Egyptinn reyndi að stoppa hann. Sóknin endaði með marki Guus Til.

„Slot þarf að taka ákvörðun, ætlar hann að fá sparkið með Salah eða halda vinnunni án hans?“ sagði Hamann og hélt áfram. „Það sem Salah gerði var til skammar. Fyrir leikmann af hans kaliberi er þetta óásættanlegt.“

Salah hefur aðeins skorað fimm mörk á tímabilinu eftir að hafa sett 34 í fyrra og hefur verið langt frá sínu besta.