Manchester City hefur vottað aðstandendum samúð sína eftir að einn af stuðningsmönnum félagsins, Guy Bradshaw, lést skyndilega á Spáni fyrr í vikunni.
Bradshaw, sem var 35 ára gamall og frá Manchester, var staddur á Benidorm með vinum sínum til að fylgja liðinu í Meistaradeildarleik gegn Villarreal á þriðjudagskvöld. Hann fannst látinn í rúmi sínu á gististaðnum á aðfaranótt leikdags.
„Við erum mjög sorgmædd vegna andláts Guy Bradshaw, City-stuðningsmanns sem lést á Spáni fyrir leikinn gegn Villarreal í gærkvöldi. Allir hjá félaginu senda fjölskyldu hans, vinum innilegar samúðarkveðjur á þessum erfiðu tímum,“ segir meðal annars í yfirlýsingu Manchester City.
Guy hafði nokkrum klukkustundum áður birt myndband á Facebook þar sem hann sést með Campbell Hatton, syni hnefaleikakappans Ricky Hatton. Dánarorsök hefur ekki verið gefin upp, en fjölskyldan segir að ekkert saknæmt hafi átt sér stað.
Faðir hans, Martin Bradshaw, var á leið til Spánar til að hitta son sinn á leiknum. City aðstoðar fjölskylduna við að koma líkamsleifum Guy aftur til Bretlands.
