Kyle Walker hafnaði því að fara í peningana í Sádi-Arabíu þar sem hann vill halda áfram að spila fyrir England og ná 100 landsleikjum.
Þessu er haldið fram í The Sun, en Walker hefur tjáð Manchester City að hann vilji fara frá félaginu eftir hátt í átta ár þar.
Þessi 34 ára gamli bakvörður er sterklega orðaður við AC Milan og líklegast að hann endi á Ítalíu.
Walker hefur mikið verið í fréttum fyrir framhjáhald og vandræði utan vallar. Á hann til að mynda tvö börn með konu sem hann hélt fram hjá með, en hann er í hjónabandi með Annie Kilner og á einnig börn með henni.
Kilner hafði sparkað Walker út af heimilinu en virðist ætla að gefa honum annan séns. Er talið að þau vilji flytja úr landi til að reyna að byrja upp á nýtt.
Walker ætlar þó ekki til liðs í Sádí sem fyrr segir þar sem hann vill spila fyrir enska landsliðið undir stjórn Thomas Tuchel. Hann á að baki 93 A-landsleiki.
