Helgi Fannar Sigurðsson skrifar frá Sviss

Leikmenn íslenska kvennalandsliðsins komu inn á það í samtali við fjölmiðla í gær að dagurinn eftir tapið gegn Finnum hafi gert þeim vel, morgunverður með forseta Íslands og hittingur með fjölskyldum fékk þær til að gleyma vonbrigðunum.

Ísland tapaði 1-0 gegn Finnlandi og er með bakið upp við vegg fyrir leiki gegn Sviss og Noregi. Stelpurnar okkar leika gegn fyrrnefnda liðinu á morgun og verður í raun að sigra.

Leikmenn leyfðu sér að vera svekktir kvöldið eftir tapið en svo tók við morgunverður með Höllu Tómasdóttur, sem þær lofuðu í hástert fyrir ræðu sína. Jörundur Áki Sveinsson, yfirmaður knattspyrnumála hjá KSÍ, gerði það einnig í samtali við 433.is.

„Sú heimsókn var virkilega góð og Halla gerði þetta einstaklega vel. Ég hrósaði henni og sagði að þetta skipti hópinn ótrúlega miklu máli, ekki bara hópinn heldur starfsmenn líka, hvernig hún talaði til okkar. Það var virkilega smekklegt hvernig hún orðaði sína ræðu,“ sagði Jöri.

Síðar um daginn fengu fjölskyldur leikmanna að koma upp á hótel og við tók frjáls tími með þeim. Allar mættu svo endurnærðar á æfingu næsta dag, klárar í slaginn gegn Sviss.