Helgi Fannar Sigurðsson skrifar frá Sviss
Gunnhildur Yrsa Jónsdóttir, annar aðstoðarþjálfara íslenska kvennalandsliðsins, segir stress og spennu hafa verið í liðinu í tapinu gegn Finnum á miðvikudag. Það sé hins vegar búið að hrista það af sér.
„Þetta er fyrsti leikur á stórmóti. Með því kemur stress og spenna. Þetta var upp og niður en mér fannst hópurinn eiga hrós skilið þegar þær lenda manni færri. Þær gefast aldrei upp,“ sagði Gunnhildur við 433.is hér í Thun.
Ísland tapaði 1-0 gegn Finnlandi og er nú með bakið upp við vegg fyrir leikina gegn Sviss og Noregi, þar sem allt er undir í riðlakeppninni.
„Við vorum oft ólík sjálfum okkur, sem gerist oft í fótboltaleikjum. Nú erum við búin að hrista það af okkur. Þetta er stórmót og sama hvort það sé þitt fyrsta eða ekki er alltaf pressa á að gera vel. Spenna og stress er bara eðlilegt, við erum bara manneskjur með tilfinningar,“ sagði Gunnhildur enn fremur.
Hún var þá spurð út í sitt hlutverk í teymi landsliðsins. „Ég sé meira um fitness-hlutann, gymmið, upphitun, sendingaæfingar, svona fyrstu 20-25 mínútur æfinganna. Svo er ég til taks við Steina þegar hann þarf á mér að halda.“
Nánar er rætt við Gunnhildi í spilaranum.
