Diogo Jota var á leið í ferju til Englands þegar dekk sprakk á bíl hans með þeim hræðilegu afleiðingum að hann og bróðir hans létu lífið.

Jota keyrði Lamborghini Urus bíl sinn og ætlaði að taka ferjuna frá Santander á Spáni yfir til Englands.

Jota hafði nýlega gengist undir smávægilega aðgerð á lunga og var ráðlagt að fljúga ekki strax, frá þessu er sagt í heimalandi hans Portúgal.

Ferjan fer frá Santander til Plymouth og átti að fara af stað klukkan 16:00 í dag og lenda í Bretlandi á morgun.

Jota var á ferð heim til Liverpool þar sem undirbúningstímabilið fer að fara af stað, hann og bróðir hans létust báðir í þessu hræðilega slysi.

Jota var keyptur til Liverpool árið 2020. Segja má að lífið hafi aldrei verið eins gott og undanfarið fyrir Jota, hann varð Englandsmeistari með Liverpool í vor, hann vann Þjóðadeildina með Portúgal í sumar og gifti sig svo fyrir tveimur vikum. Hann átti þrjú börn með eiginkonu sinni.

Hann var 28 ára gamall þegar hann lést en Jota gerði vel fyrir Liverpool og var í stóru hlutverki í landsliði Portúgals.