Það eru meiri líkur á því í dag en í gær að Cristian Romero sé á förum frá Tottenham í sumarglugganum.

Romero hefur verið sterklega orðaður við Atletico Madrid undanfarið en Tottenham vill fá 60 milljónir punda frá spænska félaginu.

Tottenham frumsýndi í gær nýja treyju sína fyrir komandi tímabil og vakti athygli að Romero var ekki myndaður í þeirri treyju.

Atletico hefur hingað til ekki viljað borga 60 milljónir fyrir Romero sem er þó efstur á óskalista félagsins fyrir næsta vetur.

Daniel Levy sér um allar sölur og kaup Tottenham en hann er þekktur fyrir það að vera harður í horn að taka og eru allar líkur á að sá verðmiði muni ekki lækka.