Stefán Pálsson, sagnfræðingur og harður stuðningsmaður Fram, vitnaði í söguna til að lýsa þeim atburðum sem áttu sér stað á Kópavogsvelli í gær í skemmtilegum pisti á heimasíðu félagsins.
Mikil dramatík var undir lok leiks Breiðabliks og Fram í gær. Það stefndi í 0-1 sigur Framara þegar Blikar fengu afar umdeilda vítaspyrnu undir lokin. Höskuldur Gunnlaugsson fór á punktinn og skoraði.
Fyrirliðinn geðþekki vildi ólmur ná í boltann úr markinu strax og við það hófust mikil læti. Veittist hann að Kennie Chopart og Viktori Frey markverði Fram. Kyle McLagan brást við með því að taka hressilega á Höskuldi og fór það svo að lokum að báðir fengu þeir rautt spjald.
Meira
Sjáðu harkaleg slagsmál í Kópavogi í gær – Kom í kjölfar þess að umdeildur dómur hafði fallið
Stefán, sem og aðrir Framarar, voru auðvitað afar svekktir með að fara aðeins með stig heim úr Kópavoginum, eins og hann kom inn á pistli sínum, en hann skrifar slíka eftir alla leiki karla- og kvennaliðs Fram.
„Kópavogsfundurinn var haldinn sumarið 1662 á þeim slóðum þar sem vestari vítateigur Kópavogsvallar er í dag. Þar lét harðdrægur hirðstjóri danska konungsvaldsins íslenska þingmenn undirgangast einveldi konungs. Gamall maður felldi tár, ef marka má þjóðernissinnaðar kennslubækur sjálfstæðisbaráttunnar. Endurskoðunarsinnaðir sagnfræðingar bentu þó síðar á að heimildir fyrir tárfellingum og volæði á Kópavogsfundi stæðu á veikum sagnfræðilegum grunni. Þvert á móti hafi flugeldum verið skotið á loft af þessu tilefni. Hvað sem þessum meiningarmun líður eru flestir sammála um þá niðurstöðu að Kópavogsfundurinn hafi sökkað feitt. Hann hafi jafnvel sökkað feitast af öllum atburðum á stór-Kársnessvæðinu þar til að ódýr vítaspyrna rændi Framara tveimur af þremur stigum á dramatísku júníkvöldi árið 2025. Þetta er frásögnin af því.“
Svona hófst pistill Stefáns, sem fór svo nánar út í atburðina undir lok leiks. „Blikar virtust aldrei sérstaklega líklegir til að jafna metin þrátt fyrir að vera með boltann megnið af tímanum. En á 88. mínútu reið ógæfan yfir. Eftir mikinn darraðardans við Frammarkið, þar sem skotið var í stöng og bjargað á línu barst boltinn út í teiginn þar sem sóknarmaður Blika sparkaði í sjálfan sig og féll til jarðar. Dómarinn flautaði víti – sem var augljóst rugl. Úr því kom jöfnunarmark, sem blés markaskorara UBK (hah!) slíkt kapp í kinn að hann ákvað í kjölfarið að hrinda Viktori markverði og uppskar fyrir vikið rautt spjald. Í kjölfarið hrinti hann skapstillingarmanninum Kyle sem var rekinn útaf fyrir vikið. Réttarmorð er hugtak sem nær engan veginn yfir atburði þessara mínútna.“
