16 ára gamall knattspyrnumaður, Cameron Walsh og faðir hans, hinn fertugi David, létust vegna drukknunar eftir að bifreið sem þeir prufukeyrðu hafnaði í vatni á hvolfi.

Þetta kom fram í niðurstöðum rannsóknar á andláti þeirra, sem kom út í gær. Þetta skelfilega slys átti sér stað fyrir um einu og hálfu ári síðan, í janúar í fyrra, á Englandi.

Mercedes-bifreiðin sem þeir prufukeyrðu lenti á staur og valt síðan ofan í vatnið, með ofangreindum afleiðingum.

Camoron og David sátu fastir í bílnum, ofan í vatninu, í um 45 mínútur áður en slökkviliðsmenn brutu rúður til að koma þeim út. Það var um seinan.

Miðað við niðurstöður rannsóknarinnar er ekki hægt að segja með vissu hver ók bílnum, en líklegt þykir að það hafi verið David, faðirinn.

Aðeins andartökum áður en slysið átti sér stað sendi Camoron skilaboð á vini sína og kærustu um hvað hann væri ánægður með bílinn sem faðir hans hafði tekið á leigu.

Vegurinn sem þeir óku er ójafn en þó skoðaður á þriggja mánaða fresti og var ekkert sett út á hann í síðustu skoðun fyrir slysið, í október 2023.

Cameron var á mála hjá yngri liðum Grimsby og þótti hann mikið efni. Hefur þeim báðum verið lýst sem miklum eðalmönnum sem verður sárt saknað.