Það er nokkuð ljóst að Jadon Sancho mun færa sig um set í sumar en hvert á eftir að koma í ljós.
Hann er kominn aftur til Manchester United eftir lánsdvöl hjá Chelsea, sem greiddi 5 milljóna punda sekt fyrir að tryggja sér ekki þjónustu hans endanlega að lánssamningnum loknum.
Sancho á ár eftir af samningi sínum við United. Hann skrifaði undir fimm ára samning þegar hann kom á 73 milljónir punda 2021 og þénar um 300 þúsund pund á viku. Er hann ekki sérlega spenntur fyrir því að taka á sig launalækkun.
United vill fá um 30 milljónir punda fyrir kantmanninn, sem hefur aldrei staðist þær væntingar sem til hans voru gerðar á Old Trafford.
Sancho hefur verið orðaður við ítölsku liðin AC Milan og Napoli undanfarið. Einnig má nefna Aston Villa, hans gamla félag Dortmund og félög í Sádi-Arabíu.
