Chelsea hefur lagt fram nýtt tilboð í Jamie Bynoe-Gittens, leikmann Dortmund, með það fyrir augum að fá hann í dag. Helstu miðlar greina frá.

Tilboði Chelsea í þennan unga kantmann var hafnað á dögunum, en hljóðaði það upp á um 30 milljónir punda. Nýja tilboðið er um 42 milljónir punda.

Chelsea vill helst fá leikmanninn í sínar raðir í dag, en það er síðasti séns upp á að hafa hann með á HM félagsliða í sumar. Takist það ekki mun enska félagið þó halda áfram að reyna.

Bynoe-Gittens er tvítugur og var í yngri liðum Chelsea á sínum tíma. Auk þess var hann hjá Reading um langt skeið og svo Manchester City áður en hann hélt til Þýskalands.

Hann sprakk út með Dortmund á leiktíðinni og vakti áhuga annarra félaga í kjölfarið.