Íslenska karlalandsliðið átti ekki merkilegan fyrri hálfleik gegn Norður-Írum og fengu á baukinn frá sérfræðingum í hálfleik.
Liðin eigast nú við í vináttulandsleik ytra og er seinni hálfleikur nýhafinn. Staðan er 1-0.
„Mér finnst þetta bara átakanlega lélegt. Við byrjuðum af krafti en svo fjaraði þetta hratt út,“ sagði Albert Brynjar Ingason í setti Stöðvar 2 Sport í hálfleik.
„Við vorum að fá stöður vinstra megin en Logi (Tómasson) er bara búinn að vera skelfilegur. Hann er alveg kraftlaus þegar hann reynir að taka menn á, þegar hann kemst í fyrirgjafastöður eru sendingarnar bara lélegar. Þetta er annar leikurinn í röð sem hann byrjar og er slakur,“ sagði Albert enn fremur og á við leik Loga gegn Kósóvó.
Lárus Orri Sigurðsson er með Alberti í setti að vanda og tók hann í sama streng. Lét hann Arnór Ingva Traustason þá heyra það, en hann missti boltann á slæmum stað í marki Norður-Íra.
„Arnór Ingvi missir boltann beint fyrir framan vörnina og við fáum mark á okkur. Nú vil ég að Arnar setji fótinn niður og taki hann út af. Refsið mönnum fyrir þetta. Þetta má ekki gerast.“
Þess má geta að Arnar tók Arnór Ingva af velli í hálfleik fyrir Ísak Bergmann Jóhannesson.
