Gary Neville, goðsögn Manchester United og núverandi sparkspekingur, er mjög hrifinn af ákvörðun Liverpool að kaupa Florian Wirtz frá Bayer Leverkusen í sumar.

Allar líkur eru á að Wirtz sé að semja við Liverpool en hann gæti kostað allt að 125 milljónir punda sem er gríðarlega há upphæð jafnvel í dag.

Neville bendir á að Liverpool þurfi að styrkja fáar stöður fyrir næsta tímabil og sérstaklega í ljósi þessa að félagið er að styrkja bæði hægri og vinstri bakvarðastöðuna.

Neville viðurkennir þó að það komi á óvart að Liverpool sé tilbúið að borga svo háa upphæð fyrir Wirtz sem er 22 ára gamall og hefur allan sinn feril leikið með Leverkusen.

,,Þegar þú vinnur deildina, hvað er það sem bætir liðið þitt? Það eina sem þú getur gert er að kaupa heimsklassa leikmenn eða leikmenn sem geta komist í þann klassa svo að fá Wirtz er frábært,“ sagði Neville.

,,Þeir fengu Jeremie Frimpong og nú er talað um Milos Kerkez og þeir sjá um hægri og vinstri bakvörðinn. Það væri sniðugt af þeim að klára þessi kaup sem fyrst en fyrir utan þetta þá myndi ég ekki búast við frekari kaupum hjá Liverpool.“

,,Ég er kannski nokkuð hissa að þeir séu að borga svo mikið fyrir Wirtz, þeir eru ekki vanir að borga svo háa upphæð en Arne Slot á það skilið. Hann hefur beðið í 12 mánuði til að kaupa leikmann.“