John Obi Mikel, fyrrum leikmaður Chelsea, hefur sagt ansi skemmtilega sögu af fyrrum liðsfélaga sínum Salomon Kalou.

Kalou og Obi Mikel voru saman hjá Chelsea í dágóðan tíma og voru góðir vinir en þeir hafa báðir lagt skóna á hilluna í dag.

Obi Mikel var að verða gráhærður yfir hegðun Kalou á sínum tíma þar sem Fílbeinsstrendingurinn var mikið í því að stela snyrtidóti þess nígeríska bæði fyrir og eftir æfingar.

,,Auðvitað Salomon Kalou, hvað get ég sagt um þennan gaur.. Við vorum kallaðir Tommi og Jenni hjá félaginu. Hann er náungi sem gat gert mig brjálaðan en ég elska hann og dýrka,“ sagði Obi Mikel.

,,Það er ekki hægt að tala illa um Salomon Kalou, hann gerði mig kannski klikkaðan en ég elskaði hann á sama tíma.“

,,Hann keypti aldrei sitt eigið snyrtidót og var alltaf rótandi í mínum búningsskáp, hann tók kremin mín og sjampóin! Það er í lagi að nota þetta en skilaðu því sem þú tókst! Hann skildi þetta bara eftir í sínum skáp.“

,,Þegar ég kem svo til hans og spurði hvar hlutirnir mínir væru þá sagði hann mér einfaldlega að fara út í búð og kaupa meira.“