Varnarmaðurinn Steven Caulker ku vera á leið í Stjörnuna í Bestu deild karla. Um er að ræða ansi stórt nafn í samhengi við íslenska boltann.

Caulker hefur spilað fyrir lið á borð við Liverpool og Tottenham í ensku úrvalsdeildinni fyrr á ferlinum, en þessi 33 ára gamli leikmaður hefur annars komið víða við. Var hann síðast í tyrknesku B-deildinni í fyrra.

Þetta var rætt í hlaðvarpinu Þungavigtin í dag, en miðað við sem fram kom þar hatar Caulker ekki að fara út á lífið.

„Mínir menn segja að ef hann skrifi undir við Stjörnuna þurfi Sindri og þeir á Auto að ræsa út aukamannskap,“ sagði Kristján Óli Sigurðsson þar.

Auto er einn vinsælasti skemmtistaðurinn í miðborg Reykjavíkur og spurning hvort Caulker líti þar við, skrifi hann undir í Garðabænum.