Þorkell Máni Pétursson, umboðsmaður og stjórnarmaður KSÍ, var gestur Helga Fannars Sigurðssonar í nýjasta þætti af Íþróttavikunni á 433.is.

Máni er mikill stuðningsmaður Stjörnunnar og var gengi liðsins í Bestu deild karla til að mynda til umræðu í þættinum. Liðið er þar með 9 stig eftir sex leiki en hefur ekki þótt sannfærandi.

„Þetta er ekki búið að vera neitt sannfærandi og bara skrýtið. Það er með Stjörnuna eins og önnur lið að menn þurfa að hafa sín gildi og sinn tilgang. Ég held að það sé það sem vantar hjá Stjörnunni, menn vita ekkert á hvaða vegferð þeir eru og hafa ekki vitað í lengri tíma,“ sagði Máni.

Máni hefur trú á Jökli Elísabetarsyni þjálfara liðsins en telur að hann þyrfti einhvern með sér í þjálfarateymið.

„En Jökull er frábær þjálfari. Hann hefur sína galla og ég hef sagt honum þá nokkra, en hann er einn af okkar efnilegustu þjálfurum. Það er stundum eins og hann vanti einn með sér sem stoppar hann af. Hann er stærfræðingur og hugsar allt alveg. Stundum þarf einhver að útskýra fyrir honum að tveir plús tveir eru allt af fjórir.

En Jökull hefur alltaf farið mjög hægt af stað og svo finnur hann taktinn. Þá verður þetta gott partí.“