Íslenska karlalandsliðið endurheimtir sterka leikmenn fyrir komandi vináttuleiki gegn Norður-Írum og Skotlandi í næsta mánuði.

Um er að ræða síðustu leiki Íslands áður en undankeppni HM hefst í haust, en þetta er annað landsliðsverkefnið undir stjórn Arnars Gunnlaugssonar.

Jóhann Berg Guðmundsson, Arnór Sigurðsson, Hörður Björgvin Magnússon og Daníel Leó Grétarsson eru allir að snúa aftur eftir meiðsli.

„Þetta eru mjög sterkir leikmenn sem hafa gert góða hluti fyrir landsliðið okkar. Jói er vonandi að ná miklu afreki á sínum ferli og spila sinn 100. landsleik,“ sagði Arnar við 433.is í Laugardalnum í dag, eftir að hafa tilkynnt um hóp Íslands.

„Þeir eru mislangt á veg komnir. Jói er búinn að spila mest af þeim, Daníel Leó svo aðeins meira heldur en hinir tveir. Haustið skiptir svo miklu máli að það er mikilvægt að þeir komi inn í hópinn, kynnist mér strax svo við þurfum ekki að eyða dýrmætum tíma í það í haust að fara yfir það allt saman.“

Það vakti athygli margra að Anton Ari Einarsson, markvörður Breiðabliks, var valinn í hópinn fyrir leikina.

„Ég er mikill stuðningsmaður Bestu deildarinnar og er alltaf að reyna að koma leikmönnum þaðan að. Það er erfitt því þeir eru að keppa við ansi sterka leikmenn sem eru að spila á mun hærra leveli en Besta deildin hér heima er. Þetta er stórt tækifæri fyrir hann.“