Manchester United er til í að losa sig við Antony strax í sumar á mun lægri upphæð en félagið keypti hann á. Football Insider segir frá þessu.

Antony gekk í raðir United á 85 milljónir punda 2022 en stóð aldrei undir þeim verðmiða áður en hann var lánaður til Real Betis í janúar á þessu ári.

Þar hefur brasilíska kantmanninum tekist að kveikja í ferli sínum á ný og hefur Betis mikinn áhuga á að hafa hann áfram hjá sér.

Það er þó ekki víst að félagið hafi tök á því fjárhagslega að kaupa Antony í sumar og gæti hann því einnig verið seldur annað. Atletico Madrid ku hafa áhuga.

Sem fyrr segir veit United að félagið fær hvergi nærri upphæðinni sem það keypti Antony á. Upphæð á bilinu 20 til 30 milljónir punda verður líklega niðurstaðan, verði hann seldur.