Jamie Carragher fór mikinn á Sky Sports í gær er yfirvofandi skipti Trent Alexander-Arnold frá Liverpool voru til umræðu.

Trent tilkynnti í gær að hann ætlaði að fara frá Liverpool þegar samningur hans rennur út í sumar. Mun hann að öllum líkindum fara frítt til Real Madrid.

Sumir stuðningsmenn Liverpool hafa tekið þessu ansi illa, enda um uppalinn leikmann að ræða, en aðrir sýna þessu skilning. Carragher segir það ekki annarra að segja stuðningsmönnum liðsins hvernig þeim á að líða.

„Ég er kominn með ógeð á að sjá fólk með enga tengingu við Liverpool segja stuðningsmönnum hvernig þeim á að líða,“ sagði Carragher meðal annars.

Carragher hefði sennilega betur litið sér nær áður en hann sagði þetta en hann hefur einmitt verið duglegur við að skipta sér af viðbrögðum stuðningsmanna annarra liða við brottför leikmanna í gegnum tíðina.

Netverjar voru fljótir að benda á þegar Liverpool-goðsögnin gagnrýndi stuðningsmenn Aston Villa fyrir að taka harkalega á móti Jack Grealish í kjölfar skipta hans yfir til Manchester City og einnig viðbragða stuðningsmanna Everton við því þegar Anthony Gordon fór til Newcastle.

„Hættu þá að segja okkur hvernig okkur á að líða,“ skrifuðu netverjar meðal annars í kjölfar ummæla Carragher.