Staða FH í Bestu deild karla vekur athygli og umræðu, liðið er á botni deildarinnar með eitt stig eftir fjórar umferðir og erfiðir leikir á næstunni bíða liðsins.

Hjörvar Hafliðason, stjórnandi Dr. Football ræddi um málið í nýjasta hlaðvarpi sínu og taldi þar upp eina ástæðu þess að FH hefur undanfarin ár verið í brekku.

Hjörvar telur að leikvöllurinn í Kaplakrika sé ein ástæða þess en í sumar verða tíu af tólf liðum í Bestu deildinni á gervigrasi. Í FH vilja menn spila á grasi og engin áætlun um að breyta því.

„Það er gott innlegg á Dr. Football síðunni þar sem rætt er um hrun FH, þarna skipta peningar máli. FH virtist ætla að taka yfir íslenskan fótbolta, fyrir tíu árum værum við að tala um langbesta klúbbinn. Málið er einn af stöðunum sem þeir hafa sofið á er að fara ekki á gervigras eins og önnur góð lið hérna á landinu, það er að aftra þeim,“ sagði Hjörvar.

Heimir Guðjónsson stýrir skútunni hjá FH en hann átti stóran þátt í árangri liðsins á árum áður. „Þeir ná aftur í Heimi Guðjónsson, þeir fara aftur í eitthvað sem gekk vel einu sinni.“

„Þessi viðbjóðslegi endir á tímabilinu þeirra í fyrra er að fylgja þeim. Haldið þið að það sé heitt undir Heimi?,“ sagði Hjörvar.

Jóhann Már Helgason telur að staða Heimis sé ekki í hættu. „Ég held að það sé ekki þannig núna, þeir eiga hrikalega erfitt prógramm. Þeir eiga Val, Víking, ÍA og Breiðablik og svo ÍBV í Eyjum, ef það er allt saman tapleikir þá endar það á einn veg eins og er í fótboltanum.“