Íslandsmeistarar Breiðabliks misstu á magnaðan hátt niður forskot sitt gegn Fram í 2. umferð Bestu deildar karla í gær. Þetta var til umræðu í hlaðvarpinu Dr. Football.
Blikar voru komnir í 0-2 þegar flautað var til hálfleiks. Á tíu mínútna kafla í seinni hálfleik sneru heimamenn dæminu gjörsamlega við og unnu 4-2.
„Hann fór að taka aðalkallana sína út af. Ég hugsaði að það yrði örugglega skynsamlegt, leikur á föstudaginn og svona,“ sagði Hjörvar Hafliðason í Dr. Football, en Halldór Árnason, þjálfari Blika, tók Andra Rafn Yeoman af velli í hálfleik og Viktor Karl Einarsson og Aron Bjarnason um miðjan seinni hálfleik, rétt áður en hrunið hófst.
„Það versta sem gerist er þegar þjálfarar ætla að vera sniðugir. Hann hætti að einhverju leyti að sýna þessum leik þá virðingu sem hann átti skilið,“ sagði Jóhann Már Helgason um málið.
„Þessar tíu mínútur, þetta var yfirgengilegt hrun. Blikar missa algjörlega hausinn og ætla að skora tvö mörk í hverri sókn, þá urðu þeir bara galopnir,“ sagði hann enn fremur.
Blikar eru því með 3 stig eftir fyrstu tvær umferðirnar, rétt eins og Fram sem sótti sín fyrstu stig í gær.
