Hagnaður knattspyrnudeildar Vals nam rúmlega 25 milljónum króna á síðasta ári. Þetta kemur fram í ársreikningi deildarinnar, sem hefur verið opinberaður.

Tekjur félagsins hækka töluvert milli ára, eða um meira en 50 milljónir, og námu þær rúmum 490 milljónum. Athygli vekur að tekjur frá miðasölu hækka frá um 11,5 milljónum 2023 í um 27 milljónir í fyrra. Gríðarlegt magn af ársmiðum seldist eftir komu Gylfa Þórs Sigurðssonar fyrir síðustu leiktíð og útskýrir það væntanlega þessa miklu hækkun.

Helstu útgjöld voru laun og launatengd gjöld. Námu þau um 355 milljónum, en um 304 milljónum árið áður.

Knattspyrnudeild Vals hagnaðist þá um rúmlega 37 milljónir króna á leikmannasölum í fyrra.

Sem fyrr segir nam hagnaður deildarinnar rúmum 25 milljónum árið 2024. Börkur Edvardsson lét af störfum sem formaður knattspyrnudeildar eftir tímabil og tók Björn Steinar Jónsson við af honum. Töluverðar breytingar urðu á bakvið tjöldin en það er óhætt að segja að Börkur og hans fólk skili góðu búi.

Ársreikningurinn í heild sinni

Meira:
Áhugaverður ársreikningur í Vesturbænum opinberaður – Launin hækka mikið milli ára

Blómlegur rekstur í Keflavík: Launakostnaður lækkaði um 50 milljónir og skiluðu góðum hagnaði

Áhugaverður ársreikningur í Kópavogi opinberaður – Tap upp á meira en 100 milljónir