Eins og flestir vita er Gylfi genginn í raðir Víkings, sem keypti hann frá Val í gær. Hlíðarendafélagið samþykkti einnig tilboð Breiðabliks í leikmanninn en valdi hann Víking.
Það var öllum ljóst undanfarna daga að Gylfi vildi fara frá Víkingi. Fjölmiðlar fóru mikinn í umfjöllun um málið og þá einna helst Hjörvar Hafliðason, Dr. Football, sem vitnaði í fjölskyldumeðlimi leikmannsins er kom að framtíð hans.
„Við höfðum ekkert sérstakan áhuga á að Gylfi færi. En við fengum skilaboð í gegnum fjölmiðla og hlaðvörp þó að bein beiðni leikmanns hafi aldrei komið um að fá að fara. En við höfum fylgst með fjölmiðlum eins og aðrir og þá var ekkert annað heldur en að fara í málið og afgreiða það á sem ásættanlegastan máta fyrir félagið. Fyrir mitt leyti og fyrir hönd stjórnarinnar og stuðningsmanna að ég held, þá er niðurstaðan mjög góð fyrir félagið,“ segir Styrmir Þór Bragason, varaformaður knattspyrnudeildar Vals, í samtali við Stöð 2/Vísi.
Styrmir segist einu sinni hafa spurt Gylfa hreint út hvort hann vildi fara í Víking, en félagið hafði sýnt honum áhuga frá því síðasta sumar.
„Það er náttúrulega alltaf eðlilegra að menn eigi heiðarleg og opin samskipti. Eins og ég sagði við hann á sínum tíma og spurði: „Viltu fara í Víking?“ Hann sagði við mig þá að það væri best og auðveldast fyrir hann að vera áfram í Val. Svo heldur þetta áfram og fer í gegnum fjölmiðla og það var einhver leið sem þeir aðilar sem standa að honum ákveða að fara. Þá var ekkert annað fyrir okkur að tækla málið út frá okkur,“ segir Styrmir.
Nánar er rætt við Styrmi hér.
