Raphael Varane, fyrrum leikmaður Manchester United og Real Madrid, opnaði sig um tíma Erik ten Hag á Old Trafford í áhugaverðu viðtali við The Athletic.

Varane var lykilmaður í hjarta varnarinnar á Old Trafford á fyrsta tímabili Ten Hag við stjórnvölinn, 2022-2023. Snemma á næsta tímabili var hann hins vegar tekinn úr liðinu og sagði hollenski stjórinn að ástæðurnar væru taktískar.

„Við áttum heitar samræður þar sem við létum skoðanir okkar í ljós. Svo spilaði ég ekki í tvo mánuði. Ég tjáði honum að ég væri ekki sammála nálgun hans í sumum hlutum er sneru að sambandi hans við leikmenn. Aðrir leikmenn voru ekki ánægðir svo ég taldi þetta mikilvægt,“ sagði Varane.

„Hann sagðist svo skilja mig en eftir það fékk ég ekki að spila. Andrúmsloftið var oft mjög rafmagnað. Stundum reyndi hann að hlusta á leikmenn en stundum ekki. Þetta var oft flókið.“

Hinn 31 árs gamli Varane gekk í raðir Como á Ítalíu eftir að samningur hans við United rann út í sumar. Hann meiddist hins vegar í fyrsta leik og lagði í kjölfarið skóna á hilluna.