Manchester United vill helst ekki selja Alejandro Garnacho en áttar sig á því að það myndi hjálpa fjárhagsstöðunni mikið.

Sky Sports fjallaði um málið í dag, en argentíski kantmaðurinn hefur verið sterklega orðaður við bæði Chelsea og Napoli.

Hinn tvítugi Garnacho kom upp í gegnum unglingastarf United og telst því uppalinn. Gagnvart fjárhagsreglum telst upphæðin sem fæst fyrir hann því hreinn hagnaður og getur það hjálpað United á félagaskiptamarkaðnum.

Ruben Amorim tók við liðinu síðla hausts og vill fá inn leikmenn sem passa inn í 3-4-2-1 kerfið sitt. Fyrst þarf hins vegar að losa og gæti félagið fengið um 60 milljónir punda fyrir Garnacho.

Napoli hefur þegar boðið í leikmanninn en tilboðið var of lágt. Chelsea hefur ekki enn lagt fram tilboð.

Garnacho er þrátt fyrir allt í þokkalega stóru hlutverki hjá Amorim og hefur byrjað fjóra af síðustu fimm leikjum liðsins.