Nú standa yfir réttarhöld yfir knattspyrnumanninum fyrrverandi Joey Barton. Er honum gefið að sök að hafa gengið í skrokk á eiginkonu sinni.

Barton á að hafa ráðist á eiginkonu sína, Georgia Barton, á heimili þeirra í London. Höfðu þau bæði drukkið mikið áfengi þetta kvöld áður en mikið rifrildi hófst.

Tvö önnur pör voru með þetta kvöld og er sagt frá því að börn þeirra hafi verið sofandi á efri hæð hússins á meðan atvikið átti sér stað.

Í réttarsal í dag var Barton gefið að sök að hóta því að slást við bróður eiginkonu sinnar sem og faðir hennar vegna fjölskylduádeilu.

Viðstaddir í réttarsal í dag fengu einnig að heyra hvernig hann kastaði henni í jörðina og sparkaði í höfuð hennar. Þegar vinur á svæðinu reyndi að stöðva hann fleygði hann honum frá og sagði: „Ekki vanvirða mig.“

Það sást töluvert á Georgia í kjölfarið og blæddi úr nefi hennar. Hún hringdi á lögreglu hágrátandi og tjáði henni að hún væri úti, eiginmaður hennar hefði lamið hana og væri enn inni í húsinu. Sagði hún jafnframt að þetta hafi verið í fyrsta sinn sem hann beitti sig ofbeldi.

Barton var handtekinn seinna um kvöldið, þá hafði hann sofnað dauðadrukkinn í svefnherbergi þeirra.

Barton og Georgia eru þó enn gift og búa saman, en hann átti að mæta fyrir rétt 2022. Þá var málið sett á ís í kjölfar þess að Georgia dró ásakanir sínar til baka.

Í fyrra var staðfest að málið yrði tekið upp að nýju í réttarsal. Barton neitar alfarið sök.

Barton, sem er fyrrum leikmaður Manchester City, Newcastle og fleiri liða, hefur undanfarin ár farið mikinn með niðrandi ummælum sínum í garð kvenna og minnihlutahópa, til að mynda.