Árið 2024 var gert upp í Íþróttavikunni á 433.is á dögunum. Þá mættu Ríkharð Óskar Guðnason og Kristján Óli Sigurðsson í settið til Helga Fannars og Harðar Snævars.

Íslandsmeistarar í knattspyrnu karla hafa lítið verið í því að verja titla undanfarin ár. Það gerði Valur síðast árið 2018 og barst þetta í tal þegar Besta deild karla var tekin fyrir í þættinum.

Ríkharð telur ljóst að það spili inn í að lið séu farin að komast lengra í Evrópukeppni. Breiðablik fór í riðlakeppni Sambansdeildarinnar 2023 og Víkingur gerði gott betur og fór í útslattarkeppnina sem hefst nú eftir áramót á þessu ári.

„Þetta horfir þannig við mér, þó Víkingar hafi verið nálægt þessu í ár, að ef lið eru í þessu Evrópuævintýri, þá þarftu bara að vera með 22 leikmenn og leikmenn sem veikja ekki neina stöðu þegar þeir koma inn,“ sagði Ríkharð.

Víkingur tapaði í hreinum úrslitaleik gegn Breiðabliki í Bestu deildinni í fyrra og tapaði þá úrslitaleik gegn KA í bikarnum. Liðið vann því næstum því tvöfalt þrátt fyrir árangur sinn í Evrópu. „Arnar Gunnlaugsson (þjálfari Víkings) nánast fullkomnar þetta, er tveimur leikjum frá þessu,“ sagði Helgi.

Það er þó ekkert nýtt að það sé erfitt að verja titla, eins og Kristján benti réttilega á í þættinum. „Sir Alex sagði alltaf að það er erfiðara að verja titil en sækja hann.“

Umræðan um Bestu deildina í heild er í spilaranum.