Federico Chiesa reynir þessa dagana að koma sér burt frá Liverpool, en félagaskiptaglugginn opnaði um áramótin og verður opinn út mánuðinn.

Franski miðillinn Foot Mercato heldur þessu fram, en það þarf ekki að koma mörgum á óvart í ljósi þess hversu fá tækifæri Chiesa hefur fengið á Anfield frá því hann kom í sumar.

Ítalinn var keyptur frá Juventus á aðeins 10 milljónir punda í sumar en hann hefur í heildina spilað 123 mínútur með Liverpool. Meiðsli hafa sett strik í reikninginn og virðist kappinn einfaldlega ekki inni í myndinni.

Það eru allar líkur á að Chiesa fari aftur til Ítalíu í mánuðinum. AC Milan, Roma og Napoli hafa öll áhuga, enda leikmaðurinn sannað sig í Serie A.

Líklegt þykir að Chiesa fari frá Liverpool á láni út tímabilið til að byrja með. Ítölsk félög eru sögð hikandi við að borga jafnvel helming launapakka hans, sem er upp á 6 milljónir punda á leiktíð.

Chiesa skrifaði undir fjögurra ára samning er hann gekk í raðir Liverpool í sumar.