Jóhann Berg Guðmundsson fyrirliði íslenska landsliðsins vonast eftir því að bjartari tímar séu handan við hornið hjá íslenska landsliðinu.

Jóhann mun leiða íslenska liðið út í leik gegn Svartfjallalandi á morgun, um er að ræða fyrsta leik í nýrri Þjóðardeild.

„Það er örlítið heitara í Sádí Arabíu en hér, maður er vanur öllu,“ segir Jóhann Berg sem samdi á dögunum við Al-Orobah í Sádí.

„Ég vorkenni ykkur aðallega að fá lítið sumar, það þarf ekki að hafa áhyggjur af mér. Vonandi verður ágætis veður og við getum spilað ágætis fótbolta á morgun,“ sagði Jóhann á fréttamannafundi í dag.

Hann fagnar endurkomu Gylfa Þórs Sigurðssonar í landsliðið sem er mættur aftur eftir tíu mánaða fjarveru.

„Bara frábær leikmaður sem getur nýst okkur vel. Reynslan skiptir máli í svona verkefni, að hafa menn sem gert þetta. Komist á stórmót, hann lyftir öllum í kringum sig upp. Heldur mönnum á tánum, menn vilja sanna sig fyrir leikmanni eins og Gylfa.“

Jóhann hefur upplifað góða og slæma tíma í landsliðinu, eftir mögur ár vonar að hann að góðir tímar séu að fara af stað.

„Ég vona það innilega, við erum lítil þjóð og þetta verður upp og niður. Það þarf allt að smella til að komast á stórmót, mér finnst við vera að finna það út hvernig við viljum spila. Menn eru að komast í stærri lið og taka meiri ábyrgð, það er allt á réttri leið og það þarf allt að smella. Það er nýtt tímabil að byrja, Þjóðadeildin hefur gefið okkur tækifæri til að komast á stórmót. Við þurfum að bera virðingu fyrir þeirri keppni, það er vonandi að þessir ungu leikmenn taki stærra hlutverk og leiði okkur á enn eitt stórmótið.“