Valur Gunnarsson sérfræðingur Fótbolta.net um Bestu deildina var hissa á talsmáta í stúkunni þegar Víkingur vann Val í Bestu deildinni á sunnudag. Valur sat í stúkunni þegar Víkingur vann dramatískan 3-2 sigur.

Valur sem kallar ekki allt ömmu sína segir orðbragðið sem stuðningsmenn Víkings hafi notað verið langt yfir öll velsæmismörk.

„Ég var rétt hjá áhorfendum Víkings, ég ætla að hrósa þeim fyrir að syngja allan tímann. En 20 prósent af því fór í að styðja við sitt lið,“ sagði Valur í Innkastinu á Fótbolta.net á mánudag.

Hann segir mestan tíma hafa farið í það að hrauna yfir leikmenn Vals og dómara leiksins.

„Hitt fór í að hrauna yfir dómarann eða hrauna yfir hitt liðið, leikmenn á vellinum og Valsara. Þetta voru ljót orð, við erum að tala um C-orðið. Ég segi það ekki í útsendingu, þetta stakk mig.“

„Þetta er rosalega virkur stuðningshópur, rosalega eru þeir orðljótir. Ég er ekki mjög blygðunargjarn en ég var oft hissa hvað þeir leyfðu sér að segja.“

Valur og maður sem hann ræddi við á vellinum voru á því að Íslendingar væru ekki góðir í þeirri list eins og Bretarnir að vera með góðlátleg grín á knattspyrnuvöllum.

„Ég hitti einn í hálfleik sem nefndi þetta af fyrra bragði, Íslendingar eru ekki nógu sniðugur til banter. Það væri gott ef þeir myndu styðja liðið sitt meira.“