Christopher Brazell var rekinn úr starfi hjá Gróttu á sunnudag eftir afleitt gengi í Lengjudeildinni í sumar. Þessi ungi Englendingur er þó eftirsóttur.

Fótbolti.net sagði frá því í gær að lið í efstu deild hefðu áhuga á að fá hann sem aðstoðarþjálfara.

Samkvæmt heimildum 433.is er KR eitt þeirra liða sem vill fá Brazell til starfa í haust.

Óskar Hrafn Þorvaldsson sem er nú yfirmaður knattspyrnumála og aðstoðarþjálfari KR tekur við liðinu í október.

Hann er sagður hafa áhuga á því að fá hinn 32 ára gamla Englending sem aðstoðarmann sinn.

Grótta situr í neðsta sæti Lengjudeildarinnar og ákvað stjórn félagsins að reka Brazell úr starfi á sunnudag.