Scott Parker, nýr stjóri Burnley, er himinnlifandi með að landsliðsfyrirliðinn Jóhann Berg Guðmundsson hafi ákveðið að snúa aftur til Burnley í sumar.

Jóhann yfirgaf Burnley í vor eftir átta ár hjá félaginu en tók U-beygju á dögunum og skrifaði undir nýjan samning.

„Það gefur okkur mjög mikið. Hann kemur inn með mikla reynslu og þekkingu á félaginu. Hann kemur líka með mikil gæði og hann er einhver sem ég man mjög vel eftir að spila á móti,“ segir Parker um Jóhann.

„Vonandi kemur hann með allt sem ég ætlast til af honum og ég er viss um að hann gerir það. Hann mun hjálpa okkur mikið í ár.“

Burnley mun spila í ensku B-deildinni á næstu leiktíð. Liðið var nýliði í ensku úrvalsdeildinni í fyrra en féll strax aftur niður í B-deild undir stjórn Vincent Kompany. Parker, sem einnig hefur stýrt Fulham, Bournemouth og Club Brugge, tók við í sumar.