Elísabetu Ósk Guðmundsdóttur hefur verið sagt upp störfum hjá KSÍ en þetta herma heimildir 433.is. Elísabet hafði starfað um tveggja ára skeið á knattspyrnusviði sambandsins.

Nafn Elísabetar er ekki að finna lengur undir nafnalista starfsfólk KSÍ en þar hafði nafn hennar verið síðustu tvö árin.

„Ég ætla ekki að tjá mig um málefni einstakra starfsmanna í fjölmiðlum,“ sagði Jörundur Áki Sveinsson, starfandi framkvæmdastjóri KSÍ við 433.is í gær.

Meginverkefni Elísabetar hjá KSÍ voru tengd A-landsliði kvenna og öðrum landsliðum, og heilbrigðismálum.

Elísabet var ráðin inn til KSÍ skömmu fyrir Evrópumót kvenna árið 2022 þar sem hún var með liðinu í ferð þess til Englands. Síðasta verkefni hennar var í byrjun þessa mánaðar þar sem liðið mætti Austurríki í tveimur leikjum, í því verkefni voru gerð nokkuð stór mistök hjá starfsliði KSÍ þar sem gleymdist að skrá tvo leikmenn á skýrslu. Gátu leikmennirnir ekki tekið þátt í leiknum vegna þess en ekki liggur fyrir hvort Elísabet hafi átt þar sök að máli.

Elísabet, sem er með bachelor-gráðu í viðburða- og íþróttastjórnun, hafði verið búsett í Ástralíu í 11 ár áður en hún var ráðin til KSÍ.

Frá árinu 2018 starfaði hún á afrekssviði Sundsambands Ástralíu þar sem hún vann  meðal annars með landsliðum við skipulag og fararstjórn æfinga- og keppnisferða, auk annarra verkefna tengdum afreksíþróttafólki, og að skipulagi og stjórnun keppnismóta og annarra viðburða.