Það var haldin kveðjustund fyrir Jurgen Klopp í M&S Bank Arena í Liverpool-borg í gær.

Klopp hætti nýverið sem stjóri Liverpool eftir níu frábær ár, þar sem hann vann allt sem hægt var að vinna.

Það var farið yfir víðan völl á viðburðinum í gær og meðal annars virtist Klopp skjóta á Chelsea. Hann hrósaði eigendum Liverpool í leiðinni.

„Við ættum að þakka fyrir að hafa þessa eigendur en ekki þá sem keyptu félag í London. Ég hefði ekki lifað af eitt ár með þeim. Loksins þegar þeir spila góðan fótbolta og eru á réttri leið er stjórinn rekinn hvort sem er. Fólk heldur alltaf að grasið sé grænna hinum megin,“ sagði Klopp meðal annars.

Þarna er hann vafalaust að tala um Chelsea og eigandann Todd Boehly. Mauricio Pochettino var látinn fara á dögunum þrátt fyrir að virðast vera að rétta af skútuna.

Þetta fór illa í marga stuðningsmenn Chelsea.

„Einn Englandsmeistaratitill á níu árum. Hann er heppinn að Liverpool er metnaðarlaust félag,“ skrifaði einn netverji.

„Við unnum jafnmarga Englands- og Evrópumeistaratitla og hann á þessum tíma og við áttum samt léleg ár,“ skrifaði annar og mun fleiri tóku í sama streng.