Greint var frá því fyrir helgi að Albert Guðmundsson sóknarmaður Genoa yrði ákærður fyrir kynferðisbrot.

Mál Alberts kom upp síðasta haust en var fellt niður. Þeirri ákvörðun var áfrýjað til ríkissaksóknara sem hefur nú fellt ákvörðun héraðssaksóknara úr gildi og lagt fyrir hann að gefa út ákæru.

Albert var að klára sitt besta tímabil sem knattspyrnumaður en fjöldi stórliða í Evrópu hefur haft áhuga á að kaupa hann í sumar. Ákæran gæti komið í veg fyrir það að mati lögfræðings sem 433.is talaði við sem telur að félög séu ekki líkleg til að greiða rúma 4 milljarða sem hefur verið verðmiðinn á Alberti á meðan svona mál er í gangi.

„Það er nánast útilokað að eitthvað gerist í málinu í sumar. Í tilviki Alberts er ekki enn búið að gefa út ákæruna en reikna má með henni á næstu tveimur vikum,“ segir lögfræðingurinn í samtali við 433.is sem telur ólíklegt að félag kaupi leikmann sem er ákærður.

Hann segir líklegast að mál Alberts komi fyrir héraðsdóm í haust þegar búið verður að loka félagaskiptaglugganum. „Það er réttarhlé í júlí og fram í ágúst þar sem nánast eingöngu gæsluvarðarhaldsmál koma fyrir dóm. Líklegur tími fyrir flutning er þá í september. Þá eru fjórar vikur í dóm og fjórar vikur í áfrýjunarfrest.“

Verði Albert sýknaður eða dæmdur sekur í héraði telur þessi reyndi lögfræðingur að málið klárist ekki þar. „Ef Albert yrði sýknaður í héraði þá er það sama embætti og tók ákvörðunina um að ákæra í málinu og líkur á áfrýjun frá þeim eru því miklar.“

„Ef það er áfrýjað í héraði þá er það yfirleitt að taka 12-14 mánuði til viðbótar. Heildartími málsins gæti því orðið 18-20 mánuður áður en endanleg niðurstaða fæst.“

Lögfræðingurinn telur að málið gæti þó fengið einhverja flýtimeðferð sökum þess að Albert býr erlendis. „Þá yrði reynt að koma þessu fyrir í byrjun ágúst en þá er eftir tíminn til að semja dóminn og áfrýjunarfrestur. Ég held að félagaskipti í sumar séu mjög ólíkleg.“

Á meðan málið er á þessu stigi má Albert ekki spila með íslenska landsliðinu en KSÍ hefur sett sér reglur sem banna það að leikmaður sé valinn sem er með mál í kerfinu.