Sjónvarpsþátturinn Íþróttavikan kemur út alla föstudaga á 433.is og á Hringbrautarrás Sjónvarps Símans. Helgi Fannar Sigurðsson og Hrafnkell Freyr Ágústsson hafa umsjón með þættinum en gestur þeirra að þessu sinni var enginn annar en Auðunn Blöndal.
Auddi, eins og hann er oftast kallaður, er alinn upp á Sauðárkróki og harður stuðningsmaður Tindastóls. Hann sá sína menn hampa Íslandsmeistaratitlinum í körfubolta í fyrra.
„Síðasta tímabil hjá Tindastól er eitt það erfiðasta sem ég hef horft á, það var svo mikið af tilfinningum að mér leið eiginlega bara illa á leikjunum,“ sagði Auddi í þættinum, en Tindastóll vann Val eftir ótrúlegt úrslitaeinvígi.
Hann segir augnablikið það stærsta í lífi sínu fyrir utan fæðingu barna sinna en nefnir fleiri augnablik úr íþróttum sem eru ofarlega hjá honum.
„Svo er þetta United í Barcelona 1999 og Moskva 2008 (sigur Manchester United í úrslitaleik Meistaradeildarinnar í bæði skiptin). Það er kannski skrýtið að þetta séu bestu augnablik lífs míns en ef maður lifir fyrir íþróttir verða þessi augnablik helvíti stór fyrir manni,“ sagði Auddi léttur.
Umræðan í heild er í spilaranum.
Íþróttavikan er í boði Bola léttöl og Lengjunnar
