Margrét Elíasdóttir, fyrrum starfsmaður KSÍ til margra ára sagði upp störfum sínum hjá sambandinu árið 2021 þegar Guðni Bergsson og stjórn hans sögðu af sér.

Margrét virðist ekki spennt fyrir því að Guðni verði aftur formaður sambandsins og Borghildur Sigurðardóttir, varaformaður KSÍ tekur undir þetta. Guðni sagði af sér haustið 2021 þegar sambandið var sakað um að hylma yfir meint brot landsliðsmanna í knattspyrnu.

Guðni er í framboði til formanns á nýjan leik og berst við Þorvald Örlygsson og Vigni Má Þormóðsson um stólinn. Kosið verður á morgun.

Margrét skrifar á Facebook síðu sína og deilir þar færslu. „Í tilefni formannskosningar KSÍ n.k. laugardag er gott að rifja upp hvernig f.v. formaður KSÍ Guðni Bergsson sem nú er í framboði tók á málum sem gerðu það að verkum að bæði stjórnarmenn og starfsmenn til margra ára hrökluðust í burtu,“ skrifar Margrét.

Í skýrslu út­tekt­ar­nefnd­ar ÍSÍ sem var birt um þessi mál KSÍ kom fram að Margrét hefði verið búin að láta Guðna Bergsson vita af meintu kynferðisbroti gegn tengdadóttur sinni. Í Kastljósi árið 2021 hafði Guðni sagt að ekkert formlegt mál væri á borði KSÍ, í seinni tíð hefur hann talað um að hann hafi ekki viljað taka forræði af meintum þolanda í sínu máli.

Nokkuð af áhrifafólki í íslensku íþróttafólki setur „læk“ við færslu Margrétar og vekur þar athygli að Borghildur er ein þeirra en hún starfaði lengi með Margréti og Guðna í KSÍ. Borghildur er að hætta sem varaformaður sambandsins.

Ásthildur Helgadóttir fyrrum landsliðskona er líka ein þeirra sem og Þorvaldur Makan fyrrum knattspyrnumaður. Þar má einnig sjá stuðning frá Gunnari Gylfasyni, fyrrum starfsmanni KSÍ og fleirum tengdum íslensku íþróttalífi.