Hafnarfjarðarbær fékk Deloitte til að skoða bókhald aðalstjórnar FH vegna kostnaðar við byggingu á Skessunni og misræmis í ársreikningum félagsins. Tengist það viðræðum um kaup bæjarins á knatthúsinu. 433.is birti erindi bæjarins fyrst miðla í gær.
Viðar Halldórsson, formaður aðalstjórnar FH, fékk til að mynda 61 milljón króna fyrir að stýra byggingarframkvæmdum á Skessunni, sem ekki var gert ráð fyrir í samkomulagi við bæinn. Þá hefur félag í eigu bróður hans, Jóns Rúnars Halldórssonar, Best Hýs, fengið nærri 400 milljónir króna greiddar frá FH undanfarin ár. Samkvæmt ársreikningum þess félags námu tekjurnar þó aðeins 99 milljónum króna á árunum 2018-2022.
Meira
Hafnarfjarðarbær sendir langt erindi til FH og krefst svara – „Þessi ákvörðun er tekin án samþykkis“
Davíð Þór Viðarsson, yfirmaður knattspyrnumála hjá FH, tjáði sig við kvöldfréttir RÚV í gær án þess þó að fara mikið efnislega í málið.
„Ég skil alveg að það vakni spurningar. Við reynum að útskýra það eins vel og við getum og svo er það mat fólks að dæma um það. En í mínum bókum hafa þessir tveir menn unnið ótrúlegt starf fyrir þetta félag undanfarna áratugi. Það er ekkert sem mun breyta því,“ sagði hann.
„Þetta er auðvitað erfið umræða. Það er aldrei gaman að vera í skotlínunni. Umræðan eins og hún hefur birst í dag, okkur finnst kannski ansi harkalega að okkur vegið.“
Það vekur athygli að síðasta spurning Hafnarfjarðarbæjar til FH í erindi sínu snýr að hugsanlegum gjaldþrotaskiptum. Hljóðar hún svona: Hefur aðalstjórn lagt mat á stöðu FH út frá 64. gr. laga um gjaldþrotaskipti nr. 21/1991? Ef svo er þá er óskað eftir fundargerð frá fundi aðalstjórnar þar sem það var rætt.
Það er vert að skoða hvernig umrædd lagagrein hljóðar til að setja þessar vangaveltur bæjarsins í samhengi.
„Skuldari getur krafist að bú sitt verði tekið til gjaldþrotaskipta ef hann getur ekki staðið í fullum skilum við lánadrottna sína þegar kröfur þeirra falla á gjalddaga og ekki verður talið sennilegt að greiðsluörðugleikar hans muni líða hjá innan skamms tíma,“ segir þar meðal annars.
„Skuldara, sem er bókhaldsskyldur, er skylt að gefa bú sitt upp til gjaldþrotaskipta þegar svo er orðið ástatt fyrir honum sem segir í 1. mgr. [Nú láta þeir sem bærir eru um að taka ákvörðun um að leita gjaldþrotaskipta á búi slíks skuldara sem ekki er einstaklingur það hjá líða og bera þeir þá skaðabótaábyrgð gagnvart lánardrottnum skuldarans að því leyti sem þeir fara af þessum sökum á mis við fullnustu krafna sinna, enda sýni þeir ekki fram á að sú vanræksla hafi ekki verið þeim saknæm.]“
Aðalstjórn FH sagði þó í yfirlýsingu í gær að félagið búist við því að ná samkomulagi við bæinn á næstunni um kaup á Skessunni. „Þar með mun sveitarfélagið eignast megnið af mannvirkjum FH í Kaplakrika rétt eins og það á nær öll önnur íþróttamannvirki í bænum, til dæmis íþróttamannvirki Hauka. Ástæða kaupanna er nauðsynleg endurfjármögnun Skessunnar, sem var vígð 2019, þar sem þungur rekstur FH undanfarin ár stendur ekki undir vaxtabyrði og öðrum fjármagnskostnaði við bygginguna. Samningaviðræðurnar hafa staðið yfir með hléum síðan 2023, en FH býst við jákvæðri niðurstöðu á næstu dögum eða vikum.“
Meira
Ólga á meðal Hafnfirðinga og Davíð Þór tjáir sig – „Okkur finnst ansi harkalega að okkur vegið“
