Sævar Atli Magnússon, landsliðsmaður og leikmaður Lyngby í Danmörku, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.

Sævar atli fór aðeins yfir sína stöðu í íslenska landsliðinu í þættinum, en hann hefur verið inn og út úr hópnum undir stjórn Age Hareide, sem nú er hættur.

„Fyrsta verkefnið mitt er janúarverkefni hjá Arnari (Viðarssyni) og Jóa Kalla. Þar er ég leikmaður Lyngby í dönsku úrvalsdeildinni en er kallaður inn eftir á. Það voru leikmenn í Bestu deildinni valdir fram yfir mig. Það var mikið sjokk. En ég stóð mig vel þar,“ sagði Sævar um upphafið á landsliðsferlinum.

„Ég kem inn í þetta undir stjórn Age og þá er ég að spila vel og fullur sjálfstrausts. Ég kom inn á gegn Slóvakíu og Portúgal og stend mig mjög vel. Síðan fæ ég álagsmeiðsli á nárann. Ég fékk mjög lítið sumarfrí og er bara ekki að spila nógu vel. En ég er valinn í hópinn í september (2023) og byrja á móti Lúxemborg. Þar spilaði ég ekki vel frekar en neinn annar. Eftir þetta hef ég ekki verið nálægt því að koma inn á. Finnst mér það ósanngjarnt? Já og nei. Ég var auðvitað ekki að spila nógu vel með Lyngby.“

Sævar segist geta skilið það að aðrir leikmenn séu valdir fram yfir hann en er staðráðinn í að vinna sér inn sæti í liðinu.

„Ég fór svo að spila betur og vann mig aftur inn í þetta en þetta er búið að vera skrýtið því ég hélt ég væri kominn þarna inn (í landsliðið). En ég horfi líka í kringum mig og sé leikmenn sem eru að spila á hærra stigi en ég og eru yngri og efnilegri. Ég get ekki verið að kvarta, þarf bara að stíga upp og berjast við þá.“

Umræðan í heild er í spilaranum.