Sævar Atli Magnússon, landsliðsmaður og leikmaður Lyngby í Danmörku, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.

Sævar hefur verið hjá Lyngby síðan 2021 og verður samningslaus eftir tímabilið. Hann hefur átt í viðræðum við félagið undanfarið en sem stendur eru aðilarnir ekki nálægt því að ná saman.

„Ég ætla að byrja á að leiðrétta einn misskilning. Það komu fréttir fyrir 1-2 mánuðum um að Lyngby hefði ekkert rætt við mig. Þeir eru búnir að gera það,“ sagði Sævar í þættinum.

„Við erum ekki sammála um margt svo við erum ekki nálægt því að semja eins og er. Það er áhugi hjá mér að prófa eitthvað utan Skandinavíu ef það er hægt. En aftur á móti er mjög þægilegt að vera í Lyngby, ég elska félagið.“

Sævar er sem dæmi með einn áfangastað í huga, yfirgefi hann Lyngby á næstunni.

„Ég held að þýska B-deildin myndi henta mér mjög vel. Ísak Bergmann er til dæmis að standa sig vel þar núna. Hann er búinn að bæta sig mikið þarna,“ sagði Sævar, en Ísak er leikmaður Fortuna Dusseldorf.

„Það er mikið spilað maður á mann þarna, þetta er líkamleg deild og hröð.“

Umræðan í heild er í spilaranum.