Landsliðsmaðurinn Logi Tómasson var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.

Logi spilar með Stromsgodset í Noregi og hafnaði liðið í 7. sæti deildarinnar þar í landi á leiktíðinni sem var að ljúka.

„Þetta var upp og niður hjá okkur. Þetta er svo jöfn deild að það er oft bara liðið sem skorar fyrra markið sem vinnur leikina. Fyrir utan kannski topp 3 liðin geta allir tapað á móti öllum, og jafnvel þau líka.“

Logi var spurður út í muninn á að spila á Íslandi og Noregi, en hann yfirgaf Víking fyrir Stromsgodset á miðju tímabili í fyrra.

„Það er kannski enginn munur á æfingunum þannig séð af því ég var í Víking. En liðin í neðri hlutanum hér eru frekar langt frá tempóinu í Noregi.“

Stromsgodset var töluvert frá efstu liðum í Noregi í ár en getur kýlt ofar að mati Loga.

„Félagið vill vera að minnsta kosti um miðja deild eða ofar. Mér finnst við vera lið sem er nálægt því að koma sér í topp 4-5.“

Logi var sjálfur sterklega orðaður við belgíska úrvalsdeildarliðið Kortrijk í sumar. Bæði Logi og Freyr Alexandersson, þjálfari Kortrijk, hafa verið opnir með það að vinstri bakvörðurinn hafi verið nálægt því að fara þangað.

„Það truflaði mig aðeins í sumar þegar áhuginn var en annars var þetta mjög gott tímabil fyrir mig heilt yfir og tölfræðin auðvitað mjög góð. Svona er bara fótboltinn. Maður lærir af þessu. Ég var alveg svekktur því það voru 2-3 skipti sem ég hélt ég væri að fara að pakka í töskur. Svo var bara stopp frá stjórninni hinum megin þegar það var búið að samþykkja allt.

Þetta bara meikaði engan sense og truflaði mig aðeins í leikjunum. En ég er nýkominn út og læri af þessu því þetta verður kannski svona út ferilinn, einhver áhugi og maður þarf að vera með hausinn á réttum stað.“

Logi fer ekki leynt með að hann er til í að taka næsta skref á atvinnumannaferlinum en er þó heldur rólegur.

„Ég er bara opinn fyrir öllu. Það kemur í ljós þegar nær dregur janúarglugganum hvort eða hvað gerist. Mér líður bara ágætlega þarna og er að spila alla leiki. Það er líka mikilvægt. En ég fel það ekki að mig langar að taka næsta skref og taka leik minn á næsta plan.“

Umræðan í heild er í spilaranum.

Íþróttavikan er í boði Bola léttöl, Lengjunnar og Happy Hydrate