Úrslitaleikur Manchester City verður um næstu helgi að sögn Pep Guardiola en hans menn eru í basli þessa dagana.

City tapaði 0-4 heima gegn Tottenham í úrvalsdeildinni í gær og er fimm stigum á eftir Liverpool sem á leik til góða.

City hefur tapað þremur leikjum í röð í úrvalsdeildinni og var alls ekki sannfærandi í stórtapinu í gær.

,,Þegar þú tapar 4-0 þá geturðu bara óskað Tottenham til hamingju. Við erum viðkvæmir í dag, við vorum í vandræðum með að skora mörk í leiknum og erum neikvæðir á velli,“ sagði Guardiola.

,,Við höfum tapað þremur leikjum íu röð í ensku úrvalsdeildinni en þurfum að svara fyrir okkur. Við erum ekki vanir þessari stöðu í lífinu. Stundum gerast svona hlutir og við verðum að sætta okkur við það.“

Guardiola var svo spurður út í það hvort City myndi missa af titlinum ef liðið tapar gegn Liverpool um næstu helgi.

,,Já. Liverpool vinnur, vinnur og vinnur. Við þurfum að hugsa um næsta leik frekar en lok tímabilsins. Við þurfum að taka eitt skref í einu og fyrst og fremst hugsa um að komast í Meistaradeildina.“