Darren Fletcher, þjálfari hjá Manchester United og fyrrum leikmaður liðsins, hefur verið dæmdur í þriggja leikja bann og fékk þá sekt upp á 7,5 þúsund pund.

Ástæðan er hegðun Fletcher í hálfleik er United spilaði við Brentford í leik sem lauk með 2-1 sigri þess fyrrnefnda.

Fletcher og aðrir í þjálfarateymi United voru gríðarlega óánægðir með frammistöðu dómarateymisins í fyrri hálfleik og missti Skotinn hausinn um tíma og þarf að taka sinni refsingu.

Brentford skoraði mark er varnarmaðurinn Matthijs de Ligt var utan vallar vegna höfuðmeiðsla sem fór ansi illa í marga á hliðarlínunni.

Það var eina mark fyrri hálfleiksins en United kom til baka í þeim síðari og vann að lokum flottan 2-1 heimasigur.

Fletcher baunaði á fjórða dómarann Gavin Ward eftir að fyrri hálfleik lauk og má segja að hann hafi fengið verðskuldað bann fyrir sína framkomu.

,,Eftir að fyrri hálfleik lauk þá gekk ég til búningsklefa og mætti þar Darren Fletcher hjá Manchester United sem var ansi árásargjarn,“ sagði Ward um sína reynslu.

,,Hann benti á mig og öskraði: ‘Þið eruð allir ömurlegir, þetta er andskotans brandari í hverri einustu viku.’

,,Ég bað hann um að róa sig niður og benti á að hans framkoma væri óásættanleg í þessari stöðu. Annar starfsmaður þurfti að stöðva hann í að koma nær mér eftir það og er ég sá það þá hélt ég göngu minni áfram niður leikmannagöngin.“

,,Þegar ég var mættur í dómaraklefann þá lét ég samstarfsmenn mína vita af hegðun herra Fletcher.“